كل سنة وأنتم طيبين كلها كام يوم وييجي العيد
وطبعاً كل البيوت بدأت تحضّر في الكحك والغريبة والبسكويت والبتيفور...
وفي عدد النهارده هنقدّم لكم وصفات مختلفة لحلويات العيد، من كحك وغريبة وبتيفور وبسكويت ومعمول...
الكحك
المقادير:
1/ 4 كوب سكر
كوب سمن
كوب لبن دافئ
2 1/ 2 كوب دقيق
ملعقة صغيرة خميرة
1/ 4 ملعقة صغيرة روح كحك "ينسون ومحلب"
الطريقة:
1- نخلط السمنة مع السكر كويس جداً.
2- بعد كده نخلط الدقيق مع البيكينج باودر وروح الكحك، وبعد كده نضيفه تدريجيا على السمنة، وبعد كده نضيف اللبن الدافئ، ونخلطهم مع بعض كويس جداً.
3- بعد كده نقطّع العجينة لقطع صغيرة، ونحشيها بالحشو اللي إحنا عايزينه سواء ملبن أو مكسرات أو عجوة، وبعد كده نزيّن الكحك من بره بالمنقاش، وندخّله فرن ساخن على درجة حرارة 170، ونسيبه لمدة 30 دقيقة، بعد ما يستوي نطلعه ونرش عليه سكر بودرة.
*******************
الغريبة
علشان الغريبة تطلع معانا ناعمة لازم الزبدة اللي بنستعملها تكون ناعمة، وطبعا تكون بدون ملح.
المقادير:
2 كوب زبدة
كوب سكر بودرة
3 1/ 2 كوب دقيق
الطريقة:
1- نضرب الزبدة بالمضرب شوية لغاية لما تفك من بعضها، وبعد كده نضيف عليها السكر البودرة ونخلطهم مع بعض كويس، وبعد كده نضيف الدقيق ونعجنهم كلهم مع بعض.
2- نشكّل العجينة، ويُفضّل إننا نشكّلها بأطراف الأصابع؛ لأن باطن الإيد بيكون سخن وممكن يسيّح الزبدة، وبنكوّرها وبنرصّها على الصاج، وممكن نزيّنها بالمكسرات.
3- بعد كده ندخّل الصاج في فرن ساخن على درجة حرارة 160 ونسيبها لمدة 15 دقيقة تقريبا، ويُفضّل إننا نحطها في الرف اللي في النصف، ونتابعها دايماً علشان لونها ما يتغيّرش.
*******************
البتيفور
المقادير:
كوب زبدة طرية
1/ 2 كوب سكر بودرة
1/ 2 ملعقة صغيرة فانيليا
1 1/ 4 كوب دقيق
2 بيضة
الطريقة:
1- نضرب الزبدة مع السكر البودرة لغاية ما الخليط يبقى ناعم أوي ولونهم يبقى أبيض، وأثناء العجن بنضيف بيضة بيضة، ونسيبهم يختلطوا مع بعض كويس جداً.
2- بعد كده نخلط الدقيق مع الفانيليا، ونضيفهم على العجينة ونستمر في العجن لغاية ما نحصل على عجينة ناعمة وطرية جداً، وممكن نعمل بتيفور بالكاكاو بإننا نضيف على العجينة كمية من الكاكاو.
2- بعد كده نجيب كيس الحلواني، ونحط فيه العجينة ونبتدي نقطّعها بأشكال مختلفة، وبعد كده ندخلهم الفرن على درجة حرارة 170 ونسيبه لمدة 15 دقيقة.
3- بعد ما البتيفور يستوي ممكن نلزق البتيفور ببعضه بالشيكولاتة السايحة، ونزيّنه من بره بجوز الهند أو المكسرات.
*******************
بسكويت النشادر
المقادير:
كيلو دقيق منخول
كوب سمن
2 1/ 2 كوب سكر بودرة
5 بيضات
كوب لبن
ملعقة كبيرة نشادر
فانيليا
الطريقة:
1- اضربي السمن مع السكر لغاية الخليط ما يبقى زي الكريمة.
2- اضربي البيض مع الفانيليا كويس لغاية ما الخليط يبقى غليظ وبعدين ضيفي السكر والسمن للخليط مع الاستمرار في الخفق لغاية ما يتجانس.
3- تذاب النشادر في نصف كوباية لبن وضيفيه للخليط السابق.
4- ضيفي الدقيق بالتدريج بالتبادل مع اللبن لغاية ما تلاقي العجينة سهلة في التشكيل.
5- تشكل العجينة حسب الرغبة إما بماكينة البسكويت أو تقطع بالقطاعة، ثم ترص الوحدات في صاجات مدهونة بالزيت على مسافات متباعدة علشان مايلزقش.
6- اظبطي الفرن على درجة حرارة متوسطة ولما يسخن حطي الصاجات في الفرن.
7- ارفعي البسكويت من الصاجات وسيبيه لغاية ما يبرد خالص وبعدين رصيه في علبة.
*******************
المعمول بحشو التفاح
المقادير:
1/ 2 كوب لبن
كوب زبدة
2 كوب دقيق سميد
كوب دقيق
1/ 4 كوب سكر
2 ملعقة كبيرة ماء زهر
سكر بودرة
للحشو:
تفاح مقطّع مكعبات صغيرة
سكر بودرة أو سكر بني
زبدة
قرفة
الطريقة:
1- نغلي الزبدة مع اللبن، وأثناء ما الزبدة بتغلي نخلط الدقيق الأبيض مع دقيق السميد والسكر، وبعد كده نضيفهم على الزبدة واللبن، ونعجنهم كويس مع بعض مع إضافة ماء الزهر، ونسيب العجينة تبرد شوية.
2- بعد كده ننقلها في طبق تاني، ونغطّيها ونشيلها في الثلاجة لمدة 8 ساعات.
3- بعد كده نطلّع العجينة من الثلاجة، ونقطّعها لقطع صغيرة ونحشيها ببحشو التفاح أو بالعجوة، ونشكّلها زي ما إحنا عايزين، وندخله الفرن على درجة حرارة 170 ونسيبه لمدة 25 دقيقة.
لتحضير حشو التفاح:
نشوّح التفاح في كمية صغيرة من الزبدة وكمية صغيرة من السكر البودرة أو السكر البني وشوية قرفة.
