عايزة أتجوز من غير نيش

بقلم: رانيا الجبالي

من غير نيش

قلت في يوم أنا عاوزه أتجوز

عاوزاه حلو ومش بيبوز

أحلم معاه وأعيش في قلبه

وصورتي جنب صورته تتبروز

ردت أمي قالت وماله

أبوكي ينزل يشتري الكارتين

هو صحيح علي أد حاله

بس مش هتدخلي من غير فناجين

ولازم النيش يتملي أطباق

وفي الادراج تلاقي سكاكين

والقايمه عشان لو حصل طلاق

ومؤخر كده يملي العين

هنجيب الورد والدباديب

ومن كل طقم هنجيب عشرين

ملايات سرير تملي الدولايب

مش هو برضو عامل دولابين

هو أكيد هيكون مسافر

يتجوز ويعيش معاكي شهرين

وبعد مايسيبك ويسافر

تيجي تقعدي عندنا سنتين

ويجي ياخدك انتي وابنه

يقضي معاكم أسبوعين

وأهي فرصه تقربي منه

وترجعي لنا يانور العين

خايفه أكون نسيت حاجات

بس خلاتك أكيد فاكرين

يلاقوليلي نوع التلاجات

ما انا هجيب لك تلاجتين

أنا هتجوز من غير نيش

من غير صيني أوميلامين

من غير قايمه متساويش

أضيع من عمري أجمل سنين

من غير نيش يابايره

حاطه عينك علي مين

أكيد واحد دماغه طايره

مين يابت من المجانين

مجنون بيحب الحياه زيي

بيحبها من غير كارتين

لو اتعميت يبقي ضيي

ولو اتغميت يبقي حزين

لاياختي متلاقيش

هتتجوزي زي التانين

بقايمه غاليه وأحلي نيش

والحب هيجي بعدين

أنا قلت لأمي أسفه

مش هقدر أتجوز نيشين

نيش من أبو ضلفه

ونيش ماشي برجلين .

من غير نيش

ههههههههههههههههههههههه
فعلا شوار البنات بقي شبة تخزين البضايع كدا
وبقي كل التفكير ف الماديات
تسلم يا امير ع التوبيك

ياعم ازاى دة لازم النيش

ههههههههههههههههههههههههههه

انا غلطان اني عايز اسهلكم الجواز

هات النيش يا ادم

زائر

ههههههههههههههههههههههههههههههههه
يا سلام على النيش

مبكره بقي هيكملو

عايز اتجوز من غير شقه