ليه الشيطان كان بيخاف من سيدنا عمر بن الخطاب؟

قال رسول الله صلى الله عليه وسلم:

والله ياعمر لو سلكت طريقا لسلك الشيطان طريقا غيره

السؤال: ليه كان الشيطان بيخاف من سيدنا عمر بن الخطاب رضى الله عنه؟

سيدنا عمر كان معروف بقوته البدنيه هل ياترى كان هيضربه؟

لا طبعا لأنه مبيشوفهوش عشان يضربه.

السبب نعرفه لما نسأل نفسنا هو ايه اللى الشيطان بيعمله بالظبط؟

ايه اللى هو بارع فيه؟

ايه اللى هو أقسم لله تعالى عليه؟

هو أقسم وقال (فبعزتك لأغوينهم أجمعين)

يبقى الشيطان كل همه انه يدخلك النار؟

لأ الشيطان كل همه انه يخلدك فى النار ومش فى اى مكان فى النار فى الدرك الأسفل من النار

فالشيطان بيشتغل مع الإنسان على أكتر من مرحله:

أولا يخلدك فى النار فى الدرك الأسفل منها مع المشركين والكفار..طب مقدرش يخليك تكفر او تشرك بالله يبقى يخليك مع منافقين فى الدرك الأسفل منها..طب مقدرش يخليك مع المنافقين
يبقى يدخلك النار تدوق من لهيبها وتكفر عن ذنوبك اللى عملتها وعلى قد ما ذنوبك تبقى كتير على قد طول الفتره اللى هتقعدها فى النار
طب لو مقدرش يدخلك النار خالص
يبقى متدخلش الجنه..يخليك من أهل الأعراف لا هم فى الجنه ولا هم فى النار.
طب مقدرش عليك ودخلت الجنه..تفتكر هيسيبك..لا هيفضل معاك انك متبقاش فى الفردوس الأعلى مع النبيين والصديقين والشهداء..عايز يخليك آخر واحد يدخل الجنه او فى أقل درجه من الجنه

نرجع لسؤالنا هو سيدنا عمر بن الخطاب كان بيعمل ايه عشان الشيطان يخاف منه؟

قلنا ان الشيطان شغلته اغواءك ويوسوسلك بالمعاصى عملتها... تبقى حبيبه معملتهاش هيفضل يشغلك بيها انك ع الأقل متعملش خير.

فسيدنا عمر كان كل م الشيطان يوسوسله بمعصيه يروح عامل حسنه مثلا يذكر ربنا او يستغفره او يتصدق او يصلى ركعتين.

فالشيطان لقى ان كل مهو يوسوس لسيدنا عمر بمعصيه هو يقابلها بحسنه فقال لا كده انا بخليه يزود حسناته فبعد عن سيدنا عمر نهائى لأن جايز سيدنا عمر مكنش بيفكر يعمل حسنه فلما الشيطان يوسوسله بمعصيه فكأنه بيفكره يعمل حسنه..

فقال لا يبعد عنه وما يوسوسهوش بأى معصيه نهائيا عشان سيدنا عمر ميزودش حسناته.

احنا كمان نقدر نعمل زى سيدنا عمر مش بقول انها سهله بس هتيجى بالتعود واخلاص النيه لله واخلاص العمل ..مش متعبه والله ياجماعه دى بس عايزه اراده ومثابره مره هنعملها ولما ييجى الشيطان يوزنا على معصيه هنفتكر ومثلا نستغفر ربنا كتير نطلع صدقه نسبح ربنا بأى ذكر او تسبيح وممكن مره تانيه نقع فعلا فى المعصيه..مش مهم بعد ما نقع نرجع نتوب ونستغفر ونعمل حسنه تكفر عن المعصيه دى مره هنعملها ومره هنقع فى المعصيه لكن بالمثابره والعزيمه والإصرار واتكالنا على الله أكيد هنوصل بعون الله نخلى عندنا يقين فالله وثقه فى أنفسنا اننا نقدر نوصل للهدف ده الا وهو

(وهو وشاب نشأ فى طاعه الله)

وهو من السبعة اللى يظلهم الله فى يوم لا ظل الا ظله والفردوس الأعلى مش هنتنازل عنه نهائيا مهما عمل الشيطان ومهم وزنا على معاصى مش هنسمع له ولو حصل وغلطنا مرة هنرجع تانى ونتوب ونستغفر.

الشيطان قال لرب العزه ( وعزتك وجلالك لا ابرح اغوى بنو آدم مادامت الأرواح فيهم)
فرد عليه ربنا سبحانه وتعالى ( لا ابرح أغفر لهم ماداموا يستغفروننى)

( إن إبليس قال لله عز وجل: وعزتك وجلالك لا أبرح أغوي بني آدم ما دامت الأرواح فيهم ، فقال الله تعالى: فبعزتي وجلالي لا أبرح أغفر لهم ما استغفروني ) ..... ( أخرجه أحمد في المسند ).

اخيرا الدعاء اللى قصم ظهر الشيطان ويخليه ميقربلكش بأذن الله:

اللهم انك سلطت علينا عدوا عليما بعيوبنا يرانا هو وقبيله من حيث لا نراهم اللهم آيسه منا كما ايسته من عفوك و رحمتك وباعد بيننا وبينه كما باعدت بين المشرق والمغرب)

اللهم امين

منقوووووووووووول